কথা কোৱা সোণপৰুৱা

পৃথিৱীখনক দুহাতত তুলি লোৱাঃ

পৃথিৱীখনক দুহাতত
তুলি লোৱা

নহ'লে বসন্ত নাহিব
নহ'লে চৰাইবোৰ বাহলে' নাহিব
নহ'লে বাঁহপাতে গগণা বজাই
নানাচিব সপোনৰ দুপৰত

তেজবোৰ বাহিৰ হ'ব নিদিবা
নিদিবা.......
এনে কিনো হ'ল
যে বুজিবগৈ পৰা নাই
তেজৰ ৰং ৰঙা
তেজৰ ৰং সঁচাকৈয়ে ৰঙা

কিমানটা উৎসৱ নাসাজো
জী থকাৰ উলাহত
পৃথিৱীতকৈ বেছি ঘূৰি নাচো বছৰত
অথচ কিয় ইমানতো ভালপাব শিকা গ'ল
বুকুভঙা পৰিণতিৰ উৎসৱ কিছুমান

শিশুবোৰ সৰিয়হনী ফালি ল'ৰিলে
কাৰ বুকুত থিতাপি লয়
প্ৰাণ-মমতা, সমবেদনা

মাটি আৰু বতাহেহে জানে
উত্তেজনাৰ দহকুৰি দহফুট গভীৰতা

পৃথিৱীখনক দুহাতত তুলি লোৱা
তেজবোৰ বাহিৰ হ'ব নিদিবা ৷